Трамп: Закажани се состаноци со Русија и Украина, разговорите се успешни

Американската влада закажа „состаноци и разговори“ со Русија и Украина, објави американскиот претседател Доналд Трамп.
„Имавме многу напорен викенд. Се занимаваме и со Израел, како и со Русија и Украина. Закажавме состаноци и разговори со различни страни, вклучувајќи ги Русија и Украина. Мислам дека тие разговори се одвиваат доста успешно“, изјави Трамп за Фокс њуз.

Во меѓувреме, Дмитриј Литвин, советник на Володимир Зеленски, рече дека планот на администрацијата на американскиот претседател Доналд Трамп за решавање на украинскиот конфликт ќе пропадне ако се состои само од прекин на огнот и бара Киев да одржи избори.
Според Ројтерс, Литвин истакнал дека Украина не е задоволна од пристапот на клучните партнери на Киев за решавање на конфликтот и дека би сакал претставниците на тие земји да имаат „подлабок пристап“ кон целата ситуација.
Претходно Зеленски изрази загриженост дека Украина може да биде исклучена од американско-руските преговори. Во интервју за АП, тој рече дека директните разговори меѓу Киев и Вашингтон се исклучително важни и дека по средбата со Трамп „би можеле да се префрлат на некој формат на разговори со Русите“.

Специјалниот пратеник на САД за Украина Кит Келог изјави дека САД сметаат дека е неопходно да се одржат избори во Украина, најверојатно на крајот на 2025 година. Според него, во постсоветската република мора да се одржат парламентарни и претседателски избори. Мандатот на Зеленски истече на 20 мај минатата година.
Во меѓувреме, медиумите објавија дека американскиот претседател Доналд Трамп и членовите на неговиот тим веќе направиле распоред за завршување на конфликтот меѓу Украина и Русија за 100 дена. Планот наводно го добиле европски дипломати и од нив стигнал до Украина.
Трамп повеќепати изрази подготвеност за контакти со рускиот претседател Владимир Путин, вклучително и можна средба. И рускиот лидер рече дека е подготвен за дијалог. Сепак, се уште нема информации за конкретен договор околу средбата или телефонскиот разговор меѓу двајцата претседатели.

Share on Facebook

Tweet

Follow us

Save