Трамп: Одам во Саудиска Арабија да потпишам договор вреден трилион долари

Американскиот претседател Доналд Трамп изјави дека најверојатно ќе го направи своето прво странско патување во Саудиска Арабија за да потпише договор со Ријад за инвестирање повеќе од трилион долари во американската економија, вклучително и купување на воена опрема.
Говорејќи пред новинарите во Овалната соба, Трамп рече дека најверојатно ќе отпатува таму во следниот месец и половина, објави Ројтерс.

Трамп рече дека првото патување во странство за време на неговиот прв мандат било во Ријад во 2017 година за да ги објави саудиските инвестиции, кои тогаш биле проценети на 350 милијарди долари.
„Овој пат тие станаа побогати, сите ние остаревме“, рече Трамп.
Тој рече дека, по негов налог, Саудијците се подготвени да инвестираат трилион долари во текот на четири години во американски компании, вклучително и купување на американска воена опрема.
„И тие се согласија да го направат тоа, па јас ќе одам таму и имам одличен однос со нив и тие беа многу добри“, рече Трамп.

Саудиска Арабија игра сè поважна улога во американската надворешна политика, наведува агенцијата.
Специјалниот пратеник на Трамп за Блискиот Исток, Стив Виткоф, им изјави на новинарите дека Саудијците ќе бидат домаќини на состанокот САД-Украина следната недела на кој ќе се разговара за прекин на огнот во војната во Украина.

Share on Facebook

Tweet

Follow us

Save