Трамп: Постигнат е договор со Кина за извоз на ретки метали

Американскиот претседател Доналд Трамп денеска изјави дека постигнал договор со кинескиот претседател Си Џинпинг во спорот околу контролата на извозот на ретки метали од страна на Кина, јави ДПА.

Трамп рече дека пречките се отстранети и дека договорот првично ќе важи една година.

„Проблемот со ретките метали е решен, и тоа за целиот свет… Ова не беше само ситуација во Соединетите Американски Држави. Нема повеќе кинеска блокада. Секоја земја – Јапонија, Јужна Кореја и многу други со кои се сретнавме таму – инвестира огромни суми пари во Соединетите Американски Држави, пари какви што никогаш порано не сме виделе“, рече Трамп истакнувајќи дека ова е историски успех.

Тој не даде дополнителни детали за условите на договорот.

Трамп и Си се согласија да работат заедно за решавање на конфликтот во Украина.

„Украина – двајцата ќе работиме заедно. Се согласуваме дека страните се заглавени во борба и понекогаш, претпоставувам, мора да ги оставите да се борат. Но, ние ќе работиме заедно за Украина“, рече Трамп.

Американскиот и кинескиот претседател разговараа во јужнокорејската воздухопловна база, при што двајцата лидери звучеа оптимистички во врска со ублажувањето на трговските тензии меѓу двете најголеми економии во светот.

Разговорите во јужниот пристанишен град Бусан, нивната прва средба лице в лице од 2019 година, го означија крајот на бурната турнеја на Трамп низ Азија, на која се промовираа и трговските пробиви со Јужна Кореја, Јапонија и земјите од Југоисточна Азија.

Средбата, одржана на маргините на самитот на Азиско-пацифичката економска соработка (АПЕК), траеше речиси два часа.

Share on Facebook

Tweet

Follow us

Save