INFOMAX.MK

Олександр Чилик, агент на Главната управа за разузнавачки работи на украинското Министерство за одбрана, е осуден на 12 години затвор, потврди Вториот воен суд на западниот округ за руската државна новинска агенција „ТАСС“. Чилик бил уапсен во Русија пред две години.

„Судот го осуди Чилик на 12 години затвор и парична казна од 500.000 рубли. Првите три години ќе ги помине во затвор, а остатокот од казната во казнена колонија под строг надзор. Делумно ја призна вината и активно помагаше во разрешување и истражување на кривични дела“, рече вработената во судот.

Според руската Федерална служба за безбедност (ФСБ), Чилик, заедно со двајца украински воени разузнавачи, илегално преминале на руска територија за да изградат скриени складишта за оружје и да помогнат во шверцувањето експлозивни направи во земјата.

Уапсен е кога повторно се обидел да ја премине руската граница. Според судот, Чилик користел лажни документи додека минувал низ граничната контрола, инсистирајќи дека целта на неговата посета на Русија е медицински третман.