Холандија да се подготви за војна со Русија: Генерал во холандската армија повика на мобилизирање што повеќе млади луѓе

И холандската армија и целото општество мора да се подготват за можноста за војна со Русија, изјави денеска генерал-полковник Мартин Вијнен во интервју за холандскиот весник „Телеграф“.

Вијнен посочи дека Холандија треба да го следи примерот на земјите како Шведска, Финска и балтичките земји, кои граничат со Русија или се блиску до неа и се подобро подготвени за избувнување на војна, пишува порталот НЛ Тајмс.

– Холандија треба да научи дека целото општество мора да биде подготвено кога работите ќе тргнат наопаку. За цивилите, ова значи да имаат на залиха храна и вода за пиење за итни ситуации – вели тој и додава:

– Холандија не треба да мисли дека нејзината безбедност е загарантирана бидејќи е оддалечена 1.500 километри.

Вијнен предупреди дека Русија станува посилна и дека е неопходно да се има силна војска како одвраќање. Затоа, како што наведе, важно е да се елиминира недостигот од персонал во армијата. Вијнен очекува многу од волонтерската програма во младинската армија, која беше спроведена по слична програма во Шведска.

Околу 600 млади луѓе учествуваа во програмата, но Вијнен се надева дека проектот ќе привлече две до три илјади млади луѓе секоја година, од кои една третина најверојатно ќе изберат кариера во војската, а една третина ќе станат резервисти.

Share on Facebook

Tweet

Follow us

Save