Ќе се затворат ковид центрите на интерните клиники, можно е укинување на дел од рестрикциите

Состојбата со ковид пандемијата во земјава се подобрува драстично и тоа е евидентно од релаксираниот наплив на хоспитализации во ковид центрите и фактот што има намалување на бројот на дијагностицирани случаи, брифираат извори од Комисијата за заштита на населението од заразни болести.

Поради ова, додаваат тие, ќе следува и затворање на неколку ковид центри на интерните клиники во комплексот клиники „Мајка Тереза“, а меѓу првите најверојатно ќе биде оној на Клиниката за кардиологија. Доколку состојбата и понатаму продолжи да биде стабилна, не се исклучува можноста да се изземат некои од постојните рестриктивни мерки, но за ова дополнително ќе се дискутира на состанокот на Комисијата кој најверојатно ќе се одржи во среда наместо во вторник, поради професионални обврски на дел од членовите.

Во последната статистика на Институтот за јавно здравје, од направени 2.560 тестови, регистрирани се 378 нови случаи на ковид 19 од кои најголемиот број во Скопје, каде има 178. Од вкупниот број позитивни, регистрирани се 58 реинфекции. Оздравеле 432 пациенти, а за 24 часа починале седуммина на возраст од 63 до 90 години. Кај сите седум починати регистрирани се коморбидитети. Бројот на активни случаи во државата изнесува 4172.
Пишува: Мирослава Бурнс за С.Б.

Share on Facebook

Tweet

Follow us

Save