25 години од загинувањето на осумтемина бранители кај Љуботенски Бачила

Делегација на Генералштабот на Армијата и Министерството за одбрана, предводена од началникот на Генералштабот, генерал-мајор Сашко Лафчиски, денеска ќе оддаде почит на осумтемина припадници на резервниот состав на Армијата кои загинаа кај месноста Љуботенски Бачила во 2001 година. Во рамки на одбележувањето ќе биде положено цвеќе на повеќе спомен-обележја во Ѓорче Петров, Волково, Љубанци и во касарната „Илинден“.

Со активностите ќе се одбележи споменот на бранителите кои ги загубија животите за време на конфликтот во 2001 година. На 10 август 2001 година, при активирање на мина на патот кон Љуботенски Бачила, загинаа Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски, кој во 2000 година загина во вооружен напад врз полициска патрола во Арачиново.

Од Армијата истакнуваат дека со чествувањето се оддава почит кон жртвата и храброста на загинатите бранители. Делегацијата ќе положи венци и цвеќе на сите предвидени локации во текот на денот.

Share on Facebook

Tweet

Follow us

Save