30 дена притвор за командантот Жмириќ и за осумте српски полицајци осомничени за малтретирање

Судија на претходна постапка им одреди притвор до 30 дена на командантот на Специјалната антитерористичка единица (САЈ), Игор Жмириќ, и на уште осуммина сегашни и поранешни припадници на Единицата за обезбедување определени личности и објекти, поради сомнение дека во 2025 година малтретирале повеќе луѓе во гаражата на Владата на Србија.

Притвор им е одреден на осомничените со иницијали В.Л., Ј.О., Б.Ј., Д.В., Н.Д., Н.Ф., З.В., И.Ж. и М.В., согласно член 211, став 1, точки 2 и 4 од Законикот за кривична постапка.

Судот оценил дека постојат особени околности што укажуваат дека осомничените, доколку бидат пуштени на слобода, би можеле да ја попречуваат кривичната постапка преку влијание врз сведоците.

Дополнително, тие се основано осомничени за кривично дело со елементи на насилство, за кое е предвидена затворска казна поголема од пет години. Начинот на извршување и тежината на последиците од делото предизвикале вознемиреност во јавноста, што би можело да го загрози непреченото и правично водење на кривичната постапка.

Против решението е дозволена жалба до кривичниот вонпретресен совет на Првиот основен суд во Белград, во рок од три дена од приемот на решението.

Share on Facebook

Tweet

Follow us

Save