INFOMAX.MK

По успешно завршеното оценување на Лесниот пешадиски баталјон во рамки на воената вежба „Блесок-22”, денеска на Армискиот полигон „Криволак“ ќе се реализира „Ден за високи гости“.

Според програмата, преку изведување на вежба со боево гаѓање насловена „Засилен лесен пешадиски баталјон во напад“, ќе бидат демонстрирани ситуации и постапки со кои ќе се прикаже обученоста и извежбаноста на припадниците на Армијата од Лесниот пешадиски баталјон и дел од единиците кои учествуваа на вежбата „Блесок-22“.

На демонстрацијата е најавено присуство на премиерот Димитар Ковачевски, министерката за одбрана Славјанка Петровска, началникот на Генералштабот на Армијата, генерал-потполковник Васко Ѓурчиновски, претставници на Владата, на Кабинетот на претседателот на државата, на Собранието, на Генералштабот и на Министерството за одбрана, армиски генерали, команданти на команди и единици на Армијата, како и воени аташеа акредитирани во земјава.

Оценувањето на Лесниот пешадиски баталјон го спроведе оценувачкиот тим на Армијата, поддржани од оценувачи од други земји и тим на монитори од НАТО, при што официјалната оценка е „борбено оспособен за извршување на својата мисија“.