INFOMAX.MK

Минималните месечни трошоци на едно четиричлено семејство во јуни изнесуваат 39.710 денари и во однос на јануари се зголемени за 3.399 денари или за 9,49 проценти, алармира Сојузот на синдикатите на Македонија, од каде информираат дека за една година синдикалната кошничка е зголемена за 5.498 денари односно 16 проценти. ССМ потсетува дека е потребно итно зголемување на платите.

„Порастот на цените и растот на инфлацијата која од месец за месец е сѐ поголема за месец јуни изнесува 14,5 проценти и влијае врз намалувањето на куповната моќ на работниците и доведува до осиромашување на целокупното население“, велат од ССМ.

Според ССМ, зголемувањето на минималната синдикална кошничка расте поради порастот на цените, а најголемо зголемување има токму кај храната и пијалоците.

„ССМ бара оваа пресметка на синдикалната минимална кошница, како и зголемувањето на трошоците за живот да бидат причина веднаш да се пристапи кон склучување на Општиот колективен договор за јавен сектор со зголемување на платите на работниците согласно порастот на минималната плата и истите да се зголемат платите за најмалку 2.806,00 денари во нето на секој работник во јавен сектор“, велат од ССМ.