Честит празник Македонијо: 31 година слободна, суверена и самостојна Македонија!

Република Македонија денеска одбележува 31 година од успешно спроведениот референдум на кој македонските граѓани се изјаснија за самостојна и суверена држава.

Со убедливо мнозинство, над 95 отсто од граѓаните што излегоа на референдумот на 8 септември 1991 година позитивно одговорија на референдумско прашање „Дали сте за самостојна Македонија со право да стапи во иден сојуз на суверени држави на Југославија“.

“Дозволете вечерва да ви честитам на вас сите и на сите граѓани и граѓанки на Македонија, слободна, суверена и самостојна Македонија” беа зборовите со кои Киро Глигоров ја соопшти најсреќната вест за Македонците, кончно после вековна борба добивме наша, самостојна држава.

На референдумот му претходеше Декларација за независност што првиот повеќепартиски македонски Парламент ја усвои на 25 јануари 1991 година. Формално, волјата на народот за самостојна држава беше потврдена со Декларација за прифаќање на референдумските резултати на 18 септември 1991 во Собранието на Република Македонија.

Следен важен чекор беше усвојувањето на новиот Устав на 17 ноември 1991 година. Меѓународно ­правниот субјективитет на државата дефинитивно беше потврден на 8 април 1993 година кога со акламација во Генералното собрание на Обединетите нации, Македонија беше примена за 181. полноправна членка на светската организација.

Share on Facebook

Tweet

Follow us

Save