Добро утро со Инфомакс: Во моите сеќавања легенди живи, на мотиви мили, Егејски

Васко Караџа е роден на 21 мај 1923 година во село Д’мбени, Костурско. Своите први песни ги напишал во 1943 година. Во 1960 во Ташкент излезе неговата прва збирка песни „Стихови“ и првиот грчки превод на Рациновите „Бели Мугри“.

Во 1984 година во Атина излезе на грчки јазик во сопствен превод поетската збирка „Миросувањето на вечноста“, а во 1986-та во Скопје збирката „Со Егејски мотиви“ и во 1993-та збирката „Со Д’мбени во срцето“, како двојазично издание на македонски и англиски.

Караџа посветува дел од неговата поезија на децата и останатите бегалци од Егејска Македонија и на неговиот роден крај.

Добро утро Македонци, уживајте во „Сонет за скрбта“.

Сонет за скрбта – Васко Караџа
Лисја што лудиот ги завеал ветер,
Онемен камен во понор на болка,
Облак што лета во туѓиот етер,
Солзи што лее и вечно што талка –

Тоа е човекот бегалец тажен
Секогаш в срце тој скрбта ја носи,
Знак на олелија – светот наш лажен,
Непребол вечен, ах срце му коси.

Патопис, ах ако можеше некој
За оваа да напише тажна историја –
Фар тој ќе запали в светот за секој.

Секој за драмата сè нека знае,
Жестока тоа е дискриминација
За искорнатите – неправда зјае.

Разбранети сртови далечни

Разбранети сртови далечни
Треперат во бескјрајот син
Небаре бранови пенливи
Во синевината прозрачна се креваат
– Тоа гривите свои ги нацртале
Планините високи вити
Во длабочината небесна
Величави вечни

Ах како се врежани во мене
тие сртови безбројни
Разбранети разиграни
Во моите сеќавања
И сказни ми шепотат тие
И легенди живи
На мотиви мили
Егејски

Share on Facebook

Tweet

Follow us

Save