Добро утро со Инфомакс: Во тебе беа границите на Целокупна Македонија и јас дури те љубев, ја љубев сета татковина

Петре М. Андреевски е еден од најголемите, ненадминат македонски поет кој неизмерната љубов и кон саканата и кон Македонија ги преточил во маестрална поезија и проза.

Совршени чувства, со совршен избор на зборови создадоа ненадминати дела за македонската литература.
Добро утро Македонци, ужувајте во “Второ писмо” (Од циклусот Пет љубовни писма) на Петре Мито Андреевски:

Паметувам:
тебе ти прилегаше сè, како и на силот и смилот
што ме потчинуваа однадвор, а ме храбреа однатре.
Ти беше мојот Исток и мојот Величетврток,
ти беше сè што му недостасуваше на светот,
ти беше и моето незавршено минато
и затоа јас те чував и прашував за тебе.

Молњата што минува низ тебе во мене се одразува
и јас живеам затоа што знам дека и ти живееш.
Јас сум твој роб за да ја прославам слободата
и тие летни жеги околу твојот појас
и тие ладни меани во твоите пазуви
и тие кавги на ветровите пред твоите поли
и моето време што беше во твоето.

Паметувам:
што читаше дури читаше и што – кога не читаше,
како легнуваше навечер, како се проѕеваше наутро
и како денот го продолжуваше со својата насмевка,
возбудлива ко квечерина во отворена калинка.
Во тебе беа границите на Целокупна Македонија
и јас дури те љубев, ја љубев сета татковина.

Ти стигнуваше пред твоето тело, пред твојот глас
во кого ме допираа недопрени води.
Ти беше мојот Тримир и мојот Светилеб
и моето прогонство беше за да бидат целосни
твојата волја, а мојата неволја.
На дното од морињата, на врвот од копната
ти секаде прва: и пред зракот и сред мракот.

Share on Facebook

Tweet

Follow us

Save