Добро утро со Инфомакс: Јас мислев во цвеќе ќе ја најдеме Македонија, а таа во казан клаена и сите ѓаволи играат околу неа!

„Пиреј“ несомнено, за многумина, е најголемиот македонски роман. Се работи за вистински класик во македонската книжевност, кој ретко се надминува. Она што ги издвојува класиците е што истовремено носат универзални пораки, но и совршено го доловуваат времето во кое се сместени.

Страдањата на мајката која гледа како децата и умираат, а е немоќна да го спречи тоа, како и раните кои војните ги оставаат врз оние кои учествуваат во неа, особено не по своја волја. Истовремено, „Пиреј“ е длабоко испреплетен со македонската историја, тој е записник на едно тешко и мачно време за македонскиот народ, кога се случувало и двајца браќа да стојат на двете спротивни завојувани страни. „Пиреј“ е еден вид книжевен споменик на страдањата на македонскиот народ и тажната историја преполна со трагедии и растргнувања.

Добро утро Македонци, во продолжение неколку извадоци од “Пиреј”:

“… не знам кај беше ова и не знам кога беше, јас мислев во цвеќе ќе ја најдеме Македонија, а таа во казан клаена и сите ѓаволи играат околу неа, ќе ја посееш жито, а кукавици ќе ти никнат.”

~ „Животот е една една голема угорница, а уште поголема удолница по која трчам. Цел живот трчаме за да го откриеме нејзиниот крај, нејзиниот гаѕер. Кај што ќе заврши и нашето тркалање. Нашето постојано паѓање.”

~ „Ние, за умен човек имаме само еден збор, велам, којзнае зошто, ама за умен човек немаме повеќе зборови. Сигурно дека умните луѓе се малку, велам, па малку се и зборовите за нив. За лош човек имаме многу зборови, велам, колку што има лоши луѓе, толку и лоши зборови.”

~ „Добро, бре, Витомире, му велам, може ли коњот да биде вол само со тоа што ќе му го смениш името, како мене што ми го сменија презимето. Ајде кажи, ако си човек, му велам.”

~ „И рече: „дојде време да се убива брат со брата и никој да не гледа ни пријател, ни роднина. Ебати животот, рече, кога мораш ваков народ да имаш што не те гледа за ништо.”

~ „… и јас ќе одам да прашам, што ќе стане со Македонија, велам, Македонија е долга и широка, ми вели полковиот, и за Македонија одговор сега нема, одговорот е во вас, сичките нас, благодарам му велам, коњите се тепаат, а магарето го јаде ќотекот…”

Share on Facebook

Tweet

Follow us

Save