Американски сенатори му пишаа на Бајден за одбивањето на барањето на Ѓоковиќ да игра во Мајами

Американските сенатори Рик Скот и Марко Рубио му пишаа на претседателот Џо Бајден откако на најдобриот светски тенисер Новак Ѓоковиќ му беше забранет влез во земјата.

„Ни беше кажано дека барањето на Ѓоковиќ е одбиено и тој нема да може да игра во Мајами следната недела. Претседателот Џо Бајден мора веднаш да го поправи и да му дозволи да игра во нашата земја“, напиша сенаторот Скот.

Во писмото се наведува дека Новак е во совршена физичка кондиција.

„Господинот Ѓоковиќ припаѓа на светската класа на спортисти, тој е на врвот на својата форма и нема висок ризик од какви било компликации поврзани со Ковид-19. Нелогично и некоординирано е мислењето на вашата администрација да не се прифати неговото барање да дојде и да патува на територијата на САД, за да учествува во настани поврзани со неговата професија“, се вели во писмото на Скот и Рубио.

„Недостатокот на ризик за јавното здравје заедно со чистите придобивки од неговото учество на турнирот би биле одличен двигател за нашата локална економија и треба да се донесе одлука што ќе направи преседан за другите на таа позиција. Се надеваме дека ќе има целосно повлекување на задолжителната вакцинација за странските туристи кои сакаат легално да влезат во нашата голема земја“, заклучија сенаторите.

Скот потоа во твитот по објавувањето со писмото додаде дека „нема смисла Џо Бајден да изјави дека нема повеќе КОВИД и дека на Ѓоковиќ не му е дозволено да доаѓа во САД поради вакцината“.

Американските медиуми со недели шпекулираат дали најдобриот светски тенисер ќе може да игра на турнирите во Индијан Велс и Мајами, иако доби голема поддршка од организаторите на турнирот, меѓу кои и директорот на УС Опен, Стејси Аластер.

Мастерсот во Мајами е закажан од 19 март до 2 април.

Американците најавија дека од 1 мај ќе ги укинат сите забрани поврзани со коронавирусот.

Доколку се потврди дека Ѓоковиќ не добил посебна дозвола и затоа ги пропушта Мастерс турнирите во Индијан Велс и Мајами, поважно е дали ќе учествува на УС Опен, последниот Грен слем турнир во сезоната во Њујорк, кој се одржува од 28 август до 10 септември.