Обвинителката Трајчева за казната: Не знам како е донесена таква одлука, јас во предметот немам постапувано

Обвинителката Ивана Трајчева не ја добила одлуката со која е казнета од Комисијата за утврдување дисциплинска одговорност, а поради претресот во Финансиската полиција за кој претставка поднесе ексдиректорот Арафат Муареми. Трајчева за „Макфакс“ вели дека постапила во согласност со наредбата од шефицата Вилма Русковска за одлуки кои како предметен обвинител ги донела. Таа посочува дека го видела соопштението на Републичкото јавно обвинителство, како и дека во него не е посочена со име и презиме. Доколку се однесува на неа – не ѝ е јасно како е донесена ваква одлука и ќе има жалба.

„Не можам да ја коментирам одлуката во смисла на кој се однесуваат казните бидејќи ја немам примено одлуката, а во објавеното соопштение, не на страницата на ЈОРМ, нема истакнато имиња по однос на одлуката на комисијата. Доколку една од утврдените повреди се однесува на мене како обвинител, јас навистина не знам како е донесена таква одлука и секако дека ќе го искористам моето право на жалба. Ова од причина што јас во тој предмет немам постапувано како обвинител. Мое име и презиме, како и потпис, не фигурираат никаде. Она што го имам направено е да постапам по наредба од претпоставен и предметен обвинител за одлуки што тој ги има донесено во предметот по кој постапувал. Дотолку повеќе што станува збор за наредба судска, која сè уште е во сила, не е оспорена – а мене ми се става на товар дека потешко сум го прекршила законот“, изјави Трајчева за „Макфакс“.

Извор: Макфакс

Share on Facebook

Tweet

Follow us

Save