САД бара земјите-членки на НАТО да одвојат повеќе од два проценти од БДП

Земјите членки на НАТО треба да ги зголемат воените трошоци и да потрошат повеќе од два отсто од БДП за одбрана, изјави американскиот државен секретар Ентони Блинкен во интервју објавено за медиумската групација „Функе“.

„Од американска гледна точка, два проценти треба да бидат подот, а не таванот“, рече Блинкен.

Истовремено, тој потсети дека од 2022 година има нов стратешки концепт на НАТО, кој ги отсликува предизвиците на нашето време.

„Ние ѝ даваме воена поддршка на Украина од почетокот на војната. Ова доведе до фактот дека земјите на НАТО почнаа да ги намалуваат сопствените резерви на оружје. Овие празнини треба да се пополнат, за да се обезбеди стабилно темпо на производство на одбрана и трошоци за одбрана“, рече американскиот државен секретар.

Блинкен нагласи дека Вашингтон се обидува да обезбеди исполнување на веќе преземените обврски на самитот на НАТО во Велс во 2014 година.

„Во тоа време, целта беше секоја земја да одвои два отсто од својот БДП за одбраната“, објасни Блинкен.

„Проценувам дека околу две третини од членките на НАТО ќе ја достигнат целта од два отсто следната година. Ова е добро, но сакаме сите да го постигнат“, заклучи тој.

За нас е важно секој НАТО сојузник да ги исполни своите обврски над два отсто“, нагласи американскиот државен секретар.

Според него, на самитот на НАТО во јули во Вилнус ќе треба да се одлучи што е неопходно за иднината по 2024 година.

Од земјите од Западен Балкан, Македонија издвоила најголем процент средства, односно 1,61 отсто од БДП за одбраната, Албанија 1,57 отсто и Црна Гора 1,35 отсто. Хрватска потрошила 1,91 отсто, а Словенија 1,26 отсто од БДП.