INFOMAX.MK

И покрај православниот Велигден, денеска продолжија борбите во Украина, а руското гранатирање во јужниот дел на Миколаев во текот на ноќта уби двајца тинејџери, изјави во неделата воениот гувернер Виталиј Ким.

Јуриј Малашко, шеф на воената администрација во областа Запорожје, изјави дека имало „масовен напад“ од руската армија. Црквата беше оштетена, па мисата беше откажана.

„Ништо не им е свето, ниту во ноќта на Исусовото воскресение“, напиша Малашко.

Во источниот град Словјанск, во петокот руска ракета падна во станбена зона, а сега е во тек спасувачка операција. Според локални извори, под урнатините се уште има исчезнати лица. Во тој напад загинаа најмалку 11 цивили, меѓу кои и мало дете, а над 20 лица се повредени, според украински извори.

Украинскиот претседател Володимир Зеленски во неговата велигденска порака ги охрабри своите сонародници да продолжат да веруваат во победата над Русија.

„Војната не можеше да не избрише нас, нашите вредности, нашите традиции и нашите празници“, рече тој во видеото објавено во неделата.

„Денес го славиме Христовото воскресение. Главниот симбол е победата: победата на доброто, победата на вистината, победата на животот. Велигден го славиме со непоколеблива вера во неповратноста на овие победи“, додаде тој.

Зеленски истакна дека пред една година, непосредно по руската инвазија, луѓето се молеле Украина воопшто да преживее, а оттогаш Русите се исфрлени од главниот град Киев и другите области, иако борбите се уште се интензивни во исток.

„Денес се молиме Украина да победи“, рече тој.

„Веќе изминавме долг пат. Можеби најголемата планина е уште пред нас. Ќе ја надминеме и заедно ќе ја дочекаме зората. Сонцето ќе грее на југ, сонцето ќе свети на исток, сонцето ќе свети на Крим. Светло жолто сонце на мирно сино небо – тоа ќе биде светлината на правдата“, рече украинскиот претседател.

Вкупно 130 украински воени заробеници се ослободени и вратени дома во „голема велигденска размена“, изјави во неделата на православниот Велигден висок функционер од кабинетот на украинскиот претседател.