INFOMAX.MK

Наводниот лидер на групата „Исламска држава“ е убиен во Сирија за време на операција на турската разузнавачка агенција МИТ, објави турскиот претседател Реџеп Таип Ердоган, цитиран од АФП и БТА.

„Осомничениот лидер на ДАЕШ, со кодно име Абу Хусеин ал Куриши, беше неутрализиран во операција спроведена во саботата од страна на МИТ во Сирија“, објави Ердоган на телевизија.

Групата Исламска држава ја објави смртта на претходниот лидер Абу Хасан ал Хашими ал Куриши на 30 ноември, заменувајќи го со Абу Хусеин ал Куриши.

Дописникот на АФП од северна Сирија рече дека турските разузнавачки агенти и локалната воена полиција, поддржани од Турција, во саботата опколиле област во Џиндиреш, во северозападниот регион Африн.

Жителите изјавија за АФП дека операцијата била насочена кон напуштена фарма која се користела како исламско училиште.

Во средината на април, САД извршија хеликоптерска операција во северна Сирија, велејќи дека групата Исламска држава планира напади во Европа и на Блискиот Исток.

Централната команда на САД соопшти дека во операцијата е убиен висок лидер на групата ИД.

И покрај тоа што беше протерана од голем дел од територијата што некогаш ја контролираше, групата Исламска држава сè уште извршува напади во Сирија.