„Њујорк тајмс“ објави текст за врските на Вучиќ со криминалниот клан на Беливук

„Њујорк тајмс“ објави текст за претседателот на Србија, Александар Вучиќ, како и за врските на криминалниот клан на Вељко Беливук со државниот врв, пренесува N1.

На почетокот на март 2021 година, претседателот на Србија, Александар Вучиќ, се појави во живо на телевизија заедно со премиерот и министерот за внатрешни работи. Вучиќ тогаш рече дека има важна најава за апсење на подземна банда одговорна за повеќекратни убиства, пишува Њујорк Тајмс.

„Министерот за внатрешни работи ги предупреди гледачите да ги држат децата подалеку од телевизијата, додека на екранот зад него имаше фотографии од отсечени глави, тела без глава… Вучиќ ги пофали полицијата и разузнавачките служби и нагласи дека тие за влакно избегнале да бидат убиени. Тоа беше шокантна презентација, дури и во земја како Србија. Сепак, тоа беше само морничавиот почеток на кампањата на вакви откритија“, пишува овој медиум, пренесува Нова.рс.

После тоа почнаа да протекуваат детали за убиствата во предградијата на Белград, каде што мачеле, распарчувале и убивале луѓе.

„Водач на бандата беше голем хулиган, дилер на кокаин, Вељко Беливук, обвинет за убиство и голем број други тешки кривични дела. Се споменуваше дека е во добри односи со полицијата и разузнавачките служби. Тој и неговите луѓе беа фотографирани во друштво на моќници, меѓу кои беше и синот на претседателот Данило Вучиќ“, се наведува во текстот.

Беливук подоцна изјави дека неговата група работела по налог и потреби на Вучиќ, што се гледало и од судските записници.

„Беливук предупреди дека ако Вучиќ ја продолжи постапката против него, ќе има уште многу да каже“, пишува Тајмс.

Во „бизарното телевизиско интервју“ неколку месеци по неговото апсење, тој тврдеше дека луѓето на Беливук направиле „човечки кабоби“ од нивните жртви и ги испратиле кај шефот на Беливук, Радој Звитер.

„Гангстеризмот што цветаше во времето на Вучиќ, заедно со периодичните закани на Србија дека ќе ги „заштити“ етничките Срби на други места во регионот, на крајот може да го разоткрие решението што донесе мир на Балканот во 1995 година. Европејците добро го знаат тоа, како и Владимир Путин , кој има причини да ги подели и одврати. Кремљ има долга историја на поддршка на српските националисти како опколени сограѓани и има мотив повеќе од кога било – благодарение на војната во Украина – да предизвика проблеми на Балканот“, се наведува во текстот и се додава:

„Но, ризиците за Европа се подлабоки од тоа: марката на етнички шовинизам и демагогија на Вучиќ е одгласна на онаа на неговиот сојузник Путин, а ширењето на нелибералната демократија – која веќе добива на сила во делови од континентот – претставува еднаква, можеби позлобна, закана. Случајот Беливук отвори прозорец кон мрачна можна иднина, во која Вучиќ одвнатре го поткопува европскиот проект, гради држава каде демократијата е фасада, а криминалните банди се користат за ширење страв“, се нагласува во текстот.

Дополнително, Тајмс пишува дека судски било документирано дека Беливук и неговата група во претходните 10 години добивале поддршка од МУП.

Дополнително, овој медиум објаснува дека наведувањето дека сето ова можело да се случи без знаење на Вучиќ „предизвикува смеа во Белград“.

„Вучиќ има речиси целосна контрола врз сите аспекти на јавниот живот – од парламентот, преку судовите, полицијата, бизнисот… Апсењето на Беливук и неговата група е можеби една од ретките одлуки во последните години што тој не ги контролирал. “, продолжува.

„Њујорк тајмс“ тврди дека ситуацијата околу Русија, Украина и руската паравоена формација Вагнер го става Вучиќ во одлична позиција на моќ од која може да одлучи дали ќе го смири балканскиот регион или пак ќе има насилство.

Новинарот на овој медиум, кој го напиша текстот, објаснува дека пред да дојде во Србија му било кажано „дека неговите повици ќе бидат следени и дека можеби ќе биде приведен и сослушан“.

„Вучиќ брилијантно ги искористи проблемите на српската мафија, создавајќи амбиент каде нејасната граница меѓу организираниот криминал и државата работи во негова корист“, се наведува во текстот.

Дополнително, овој светски познат медиум пишува дека Беливук можеби ќе останел мал силеџија доколку неговиот живот не се случел во исто време со подемот на Александар Вучиќ.

„Околу 2012 година, кога Вучиќ ја презеде контролата врз безбедносните агенции, на стадионот на Партизан се појави нова група хулигани, а од Беливук беше побарано да им се придружи, кога почна подемот на групата Јаничари. Онаму каде што порано хулиганите имаа неформална поддршка од полицијата, главно за продажба на дрога, врските на оваа нова група со државата беа директни и политички. Беливук и неговиот нов водач Александар Станковиќ, попознат како Мутави, набрзо почнале тесно да соработуваат со своите покровители во МУП. Во една преписка Беливук ја истакнал својата лојалност, а неговиот соговорник напишал дека големиот шеф го знае тоа. Не се знае на кого се мисли“, продолжува тој.

Тајмс пишува дека како што Вучиќ ја консолидирал власта, тој постепено ја трансформирал Србија во автократија, што е поддржано од извештајот на Фридом Хаус од 2019 година.

„Сепак, барањето за прием на Србија во ЕУ тргна по својот пат, како бирократите од Европската унија да не забележале дека Вучиќ оди во погрешна насока. Еден важен лост на моќта за Вучиќ се медиумите. Тој ја искористи државната телекомуникациска компанија за купување локални ТВ станици. Телевизијата Пинк е специјализирана за реални програми и преку своите емисии му помага во сето тоа. Но, најбесрамниот скандалозен весник“, се наведува понатаму.

Овој медиум потсетува дека за време на инаугурацијата на Вучиќ во 2017 година, хулиганите, меѓу кои и членовите на јаничарите, помогнале да се отстранат демонстрантите.

„Стилот на владеење на Вучиќ станува сè поавторитарен, со јавно покажување на лојалност од страна на неговите соработници“, истакнува Њујорк Тајмс.