ЗАСИЛЕНО ЌЕ СЕ ПРОВЕРУВА КОЈ ВЛЕГУВА ВО УЧИЛИШТАТА: Ужасните инциденти во Србија го вклучија алармот и во Македонија

Протоколите за безбедносна проверка за влез и излез на учениците во училиштата и во околината од училиштата, кои беа воведени по лажните дојави за бомби, сега ќе бидат засилени со дополнителни активности од страна на МВР.

Тоа е една од превентивните мерки на Министерството за внатрешни работи што е поддржана на денешната седница на Владата.

Седница ја започна со едноминутно молчење и оддавање почит кон жртвите во двата ужасни инцидента, што се случија во Република Србија, во Белград и во близина на Младеновац.

Од страна на Министерството за образование и наука е информирано дека се изготвува прирачник за училиштата за постапување по однос на превенција од врсничко насилство и други видови насилство, како и дека се работи и на зајакнување на стручните психолошко – педагошки служби, таму каде има потреба.

Воедно, од денеска е отворена и електронска адреса [email protected], или на албански [email protected] каде што едноставно, со една порака ќе се пријавува врсничко насилство и по секоја пријава ќе се постапува веднаш.

Исто така, разгледани се можностите за одржување средби помеѓу задолжени екипи на МВР и педагозите и психолозите во училиштата, според предвидена динамика, со цел да се придонесе во пријавувањето евентуално врсничко насилство, или други видови проблеми од надлежност на министерствата за внатрешни работи и за образование и наука.

На владината седница задолжени се Министерството за образование и наука и Министерството за внатрешни работи да изготват Стратегија за превентивни активности, со чекори на државно ниво по којашто ќе бидат задолжени да постапуваат сите училишта, со цел рана превенција и заштита од несакани инциденти во училиштата и надвор од нив.

Share on Facebook

Tweet

Follow us

Save