INFOMAX.MK

Премиерот на Република Македонија, Димитар Ковачевски во врска со вчерашните настани во Косово рече дека насилството никогаш не е добра опција и дека стабилноста и напредокот во регионот може да се постигнат само преку отворен дијалог.
Ковачевски на Твитер повика на брза деескалација на ситуацијата и враќање на мирот и стабилноста.

„Сведоци сме на загрижувачка ескалација на настаните, покрај голем број повредени луѓе. Насилството никогаш не е добра опција и е за осуда, особено што војниците на КФОР се исклучително посветени на мисијата за одржување на безбедноста и стабилноста во регионот Повикувам на итен прекин на насилството, брза деескалација на ситуацијата и враќање на мирот и стабилноста на Косово. Стабилноста и напредокот во регионот може да се постигне само со отворен дијалог“, рече Ковачевски.

Тој посочи дека е потребна мирна и отворена комуникација која ќе овозможи забрзана имплементација на Договорот за нормализација, со сите анекси и меѓусебно преземени обврски.

Тој посочува дека од клучно значење е да се продолжи блиската координација и заедничките активности на НАТО и ЕУ во регионот, пред се во насока на забрзување на евроатлантските интеграции на Западен Балкан, со цел консолидирање на стабилноста и, како што наведува, стеснување на просторот за влијание на дестабилизирачки трети страни.