INFOMAX.MK

Претставникот на Соединетите Американски Држави за Западен Балкан, Габриел Ескобар, изјави дека за да се излезе од кризата на северот на Косово, неопходно е да се организираат нови избори со учество на Србите, да се исполнат обврските од дијалогот и да се формира Сојуз на српски општини, пренесува Репортери.
Во интервју за ХРТ, Ескобар изјави дека високиот претставник на ЕУ Жозеп Борел и претставникот на дијалогот Белград-Приштина Мирослав Лајчак презентирале три едноставни чекори за деескалација на северот.

„Првиот чекор е да се тргнат луѓето од улица. Исто така, градоначалниците не треба да се избираат за да привлечат внимание. Ни требаат нови избори со безусловно учество на Србите. Потребен ни е и рок за српското спроведување на обврските, и за нацрт-статутот на ЗСО. Станува збор за еднаквост, правичност и придобивки за двете страни“, нагласи Ескобар.

Тој посочи дека може да дојде до уште поголема криза доколку двете страни не го прифатат планот на ЕУ за смирување на конфликтот.

„Во Охрид беше постигнат договор за нормализација, да се создадат мирни услови меѓу двајца непријателски соседи по европски правила. Не само што ги нормализираа односите, туку се усогласија и со ЕУ. Мора да се вратиме на тоа“, додаде Ескобар.