INFOMAX.MK

ФК Вардар излезе со официјално соопштение во пресрет на натпреварот од второто коло на ПМФЛ, кој „црвено-црните“ ќе го одиграат против екипата на Шкупи.

Дуелот помеѓу поранешните шампиони ќе се одигра на стадионот „Борис Трајковски“ во Маџари, а по состанокот со претставниците на МВР, беа изнесени неколку важни одлуки.

1. На паркингот пред стадионот ќе биде забрането паркирање возила, пред и по завршувањето на мечот.

2. На стадионот ќе биде забрането внесување на сите пијалоци, како алкохолни така и безалкохолни, а воедно забранети се сите останати предмети кои ќе можат да ја загрозат безбедноста на присутните.

3. Секое нарушување на правилникот на ФФМ за фер и коректно навивање ќе биде веднаш санкционирано, затоа се замолуваат сите навивачи кои ќе присуствуваат, да не потпаѓаат под било какви провокации. Да бидеме пример, да не дозволиме дополнителни финансиски казни за клубот, сега кога повеќе од било кога сме му потребни. Најверните „Комити“ воедно побараа да се навива исклучиво за својот клуб, во текот на сите 90 минути.

4. На стадионот најпрво ќе бидат пуштени сите луѓе кои поседуваат членски и сезонски карти, а доколку капацитетот дозволува, потоа ќе бидат пропуштани и сите кои сакаат да купат единечен билет по цена од 200 денари. Исто така, ќе се врши и замена на сезонските членски карти и сите навивачи ќе имаат можност да ги добијат своите оригинални пластифицирани сезонски билети.

Натпреварот помеѓу Вардар и Шкупи ќе се одигра на тринаесетти август, со почеток во 17:00 часот.