Ако не овој вторник, следниот петок: Министрите за надворешни работи на ЕУ ветија поддршка за Украина, ама не веднаш

Министрите за надворешни работи на ЕУ се собраа во понеделникот во Киев за да изразат поддршка за Украина, повеќе од 19 месеци по почетокот на руската инвазија, но веднаш не ветија нова помош на состанокот опишан како неформален.

Состанокот „треба да се сфати како јасна посветеност на Европската унија кон Украина и нејзина постојана поддршка во сите димензии“, рече првиот човек на ЕУ, Жосеп Борел, наведувајќи дека тоа е прва средба на ова ниво надвор од ЕУ.

„Тоа, исто така, испраќа силен сигнал до Русија… Ние не се плашиме од вашите проектили или беспилотни летала“, додаде тој.

ЕУ ќе продолжи да ја поддржува војската на Киев, нејзиниот повик за одговорност и напорите да се приклучи на блокот, рече Борел по состанокот на кој присуствуваше и украинскиот претседател Володимир Зеленски.

И покрај тоа што не доделија нови средства, министрите на ЕУ изразија поддршка за континуираната поддршка за Украина и желбата на земјата да стане земја членка на долг рок.

„Иднината на Украина лежи во Европската унија, во оваа заедница на слободата. А таа наскоро ќе се протега од Лисабон до Луганск“, рече германската министерка за надворешни работи Аналена Баербок.

Француската министерка за надворешни работи Кетрин Колона рече дека средбата покажала дека Украина е дел од европското семејство и дека ќе го придружува Киев на патот напред.

Борел рече дека се надева оти земјите-членки на ЕУ до крајот на годината ќе одлучат да мобилизираат 5 милијарди евра (5,2 милијарди американски долари) за 2024 година како воена помош.

Данскиот министер за надворешни работи Ларс Локе Расмусен рече дека неговата земја го поддржува предлогот на Борел.

Министрите, исто така, ја искористија можноста да ги презентираат своите идеи и желби за континуирана поддршка.

Баербок го повтори нејзиниот повик за „заштитен штит“ за Украина пред претстојната зима. Тоа би вклучувало проширување на противвоздушната одбрана, набавка на генератори на електрична енергија и зајакнување на снабдувањето со енергија во целина, рече таа.

Првиот состанок на министрите надвор од блокот се случи откако проруски кандидат победи на изборите во Словачка, а американскиот Конгрес ја испушти воената помош за Украина од нејзиниот буџет за трошоци.

„Ние не мислиме дека поддршката на САД е разнишана…бидејќи САД разбираат дека она што е во прашање во Украина е многу поголемо од самата Украина“, изјави министерот за надворешни работи Дмитро Кулеба за новинарите додека го поздравуваше шефот на европската дипломатија Жоsеп Борел.

Во врска со изборната победа на прорускиот политичар Роберт Фицo во Словачка, Кулеба рече дека е „премногу рано да се суди“ за влијанието врз тамошната политика и нагласи дека новиот лидер допрва треба да формира коалиција.

Средбата сепак доаѓа во незгодно време за западните сојузници кои го поддржуваат Киев. Летото заврши, а украинската воена контраофанзива оди побавно од очекуваното. Недостасува големиот успех на кој западните лидери се надеваа пред есенската кал да ги фати донираните тенкови.

„Сигурен сум дека Украина и целиот слободен свет се способни да победат во овој конфликт. Но, нашата победа директно зависи од нашата соработка со вас“, им рекол украинскиот претседател Зеленски на министрите, објавено е на веб-страницата на кабинетот на претседателот.

На прес-конференцијата со Кулебa, Борел рече дека ЕУ останува обединета во поддршката за Украина и оти се надева дека предложениот пакет помош од ЕУ за Киев до пет милијарди евра за 2024 година ќе биде прифатен до крајот на годината.

Кулеба рече дека ова ќе и помогне и на Украина и на ЕУ да добијат поголема јасност за правните аспекти на трансферот на руските средства замрзнати на Запад за финансирање на реконструкцијата на Украина.