Папата Франциск повика на итно отворање на хуманитарни коридори за населението во Газа

Папата Франциск денеска апелираше „итно“ да се отворат хуманитарни коридори за жителите на Појасот Газа, кој е под израелско бомбардирање и опсада.

„Треба да се почитува хуманитарното право, пред се во Газа, каде што е итно и неопходно да се гарантираат хуманитарни коридори и да се помогне на населението“, рече папата во својата традиционална молитва на плоштадот Свети Петар.

„Одлучно барам децата, болните, постарите, жените и сите цивили да не бидат жртви на конфликтот“, рече папата Франциск.

По крвавиот напад што Хамас го изврши на израелска територија на 7 октомври, Израел прогласи „тотална опсада“ на Газа, забрани внесување храна и го прекина снабдувањето со вода и струја за 2,4 милиони жители на палестинската територија.

Папата Франциск, исто така, го повтори апелот за ослободување на заложниците киднапирани од Хамас во јужен Израел.

Share on Facebook

Tweet

Follow us

Save