Арсовска: Засадуваме нови дрвја на над 100 локации во градот

Отпочнуваме голема акција за уредување на градското зеленило во која ќе се засадуваат нови дрвја на над 100 локации во градот, информираше градоначалничката на Град Скопје, Данела Арсовска.

– Во рамките на оваа акција, се отстрануваат старите и исушени дрвја и садници, а на нивно место се засадуваат нови дрвја. Паралелно се отпочнува акција за кастрење во сите делови на Скопје, со што се овозможува непречено движење на пешаците и велосипедистите по патеките, се превенира пад на суви гранки и се обезбедува и поголема прегледност на сообраќајната сигнализација, со што се зголемува безбедноста на сите учесници во сообраќајот.

Детектиравме нереализирани решенија дури од 2010 година за кастрење на суви дрвја и гранки по пријави на граѓани и институции, затоа отпочнуваме со голема акција за уредување на градското зеленило со садење нови дрвја, кроење на крошните со што градското зеленило добива уреден лик и одстранување на сувите дрвја и садници. Согласно со затекнатата состојба, на градските улици и булевари во изминатите 10 години не биле кастрени согласно доставени барања околу 2.000 дрвја, а севкупно во градското зеленило над 5.500. Со реализацијата на овие активности се обидуваме системски да ги решаваме наталожените проблеми и ги исполнуваме барањата на граѓаните кои се надополнување на заедничките заложби за зелен и чист град, со уредено градско зеленило.

По налог на Град Скопје екипите на ЈП „Паркови и зеленило“ отпочнаа и со акција за засадување на нови дрвја секаде каде во изминатите години биле исечени и одстранети, а активностите за кастрење и одржување на градското зеленило продолжуваат интензивно. – напиша Арсовска на Фејсбук.