Комарците убиваат најголем број луѓе во светот секоја година

Милиони луѓе во светот го губат животот од надворешни причини, било да се тоа насилства, напади од животни, инсекти, сообраќајни несреќи… Но, кој од таквите причини е најголемиот убиец на луѓето?

Комарците убиваат најголем број луѓе во светот секоја година. Следи топ-листата на животни и инсекти кои директно или индиректно усмртуваат најмногу луѓе.

Како што пренесува порталот „Кликс“, комарците се причината за смртта на околу 725.000 лица годишно, во просек. Овој инсект пренесува маларија, Зика-вирус, западнонилска треска и повеќе други опасни или смртоносни болести.

Зад комарецот е човекот. Просечно, по 400.000 луѓе во една година се убиени од човек.

Змиите, статистички, се „помалку опасни“ – тие годишно убиваат околу 138.000 луѓе. Според Светската здравствена организација – СЗО, во светот има над 600 видови отровни змии, но само 200 од нив се опасни за луѓето. Кралската кобра е една од нив.

Кучињата годишно убиваат по 59.000 луѓе, главно со пренесување на болеста беснило. Ова е особено голем проблем во Азија, Африка и Средна и Јужна Америка. Следни на списокот се тн. грабливи стеници (лат.: Reduviidae), со околу 10.000 усмртени лица, скорпиите коишто усмртуваат 3.300 лица, крокодилите (1.000), слоновите (600), нилските коњи (500) и лавовите (200 убиени луѓе годишно).

Share on Facebook

Tweet

Follow us

Save