ВЛАДАТА И ДИК ОСУДЕНИ ЗА ДИСКРИМИНИЦИЈА НА ГЛАСАЧИТЕ СО ПОПРЕЧЕНОСТ: Судот утврди дека не обезбедиле пристапност до гласачките места!

Апелацискиот суд Скопје во целост ја потврди пресудата на Основниот граѓански суд Скопје од 31. март годинава со која е утврдено дека Владата и Државната изборна комисија (ДИК) сториле директна дискриминација врз лицата со попреченост при остварување на нивното право на глас.

Судот утврди дека директната дискриминација е сторена со непреземање, односно, со пропуштање да се преземат дејствија за приспособување на инфраструктурата и просторот до и во дел од избирачките места. На овој начин, тужените оневозможиле лицата со попреченост да го остварат нивното право на глас, а со тоа го попречиле и активното учество на лицата со попреченост во политичкиот живот на државата.

Судот ги задолжи Владата и ДИК до распишување на следните избори на избирачките места каде што досега тоа не е овозможено, да обезбедат:

– пристапност, рамни патишта, паркинг места соодветно обележани со боја со висок контраст, поставување знаци и бројки на видно место во поголем формат со висок контраст или звучна сигнализација до избирачките места;

– пристапност до просторијата за гласање преку поставување гелендери покрај скалилата и ѕидовите, инсталирање пристапни рампи, рачни шини, пошироки влезови, пристапен лифт или платформи кои се на нивоа и со скалила;

– пристапност во просторијата за гласање, нејзино еднакво осветлување, прераспределба на мебелот поради поголема можност за движење; поставување соодветно приспособени паравани за гласање и поставување на кутијата за гласање на соодветна висина за лица со физичка попреченост.

Дополнително, Владата и ДИК се задолжени, во пристапен формат, да го објават во медиумите диспозитивот на пресудата во рок од 15 дена по нејзината правосилност.

Ваквата судска завршница следува откако Хелсиншкиот комитет за човекови права, преку адвокат Павлина Зефиќ, на 1 февруари 2021 година поднесе тужба за заштита од дискриминација од јавен интерес.

Share on Facebook

Tweet

Follow us

Save