INFOMAX.MK

Унгарскиот министер за надворешни работи Петер Сијарто вели дека изјавите на официјални лица на одделни членки на НАТО за испраќање воени трупи во Украина го зголемуваат ризикот од нова светска војна.

„Во ваква критична ситуација, не се само дејствијата кои имаат значење, туку и зборовите имаат огромно значење. Така, кога станува збор за изјави, за можноста за испраќање војници во Украина во име на одредени земји-членки на НАТО, тоа е навистина опасно, бидејќи не сакаме да ја гледаме таа закана и застрашувачкиот ризик од приближување до светска војна“, рече Сијарто, пренесува Тасс.

За време на состанокот со опозициските лидери на почетокот на март, францускиот претседател Емануел Макрон повтори дека Франција „нема граници и црвени линии“ кога станува збор за помошта на Украина, што вклучува потенцијално испраќање копнени трупи.

Неговите зборови беа остро критикувани од бројни партнери во НАТО, меѓу кои и Германија, како и политичките партии во Франција.

Лидерите на сите политички партии го обвинија Макрон дека го вовлекува Париз во конфликтот, дека е несериозен, а го критикуваа и дека не се консултирал со парламентот за овие прашања.

Германскиот канцелар Олаф Шолц и министерот за одбрана Борис Писториус изјавија дека Берлин нема да испрати свои војници во Украина, а Шолц нагласи дека земјите од НАТО како целина нема да го сторат тоа.

Тој, исто така, повтори дека не планира да испраќа крстосувачки ракети со долг дострел Таурус во Украина, пренесува Танјуг.