Судскиот совет го одзема имунитетот на врховниот судија Наке Георгиев

Судскиот совет на вечерашната итна седница одлучи да му го одземе имунитетот на судијата на Врховниот суд Наке Георгиев и да ја одобри мерката притвор.

„Се одзема имунитетот на врховен судија заради непречено водење на кривичната постапка. Се одобрува барањето за одобрување на мерката притвор за судија на Врховен суд поднесено од судија на претходна постапка на Основниот кривичен суд Скопје. Времено се одалечува од вршењето судиска функција, судија на Врховниот суд до правосилно решавање на кривичната постапка“, соопштија вечерва од Судскиот совет.

Сомнежот е дека судијата Георгиев ветувал олеснителни мерки во судската постапка која се води против екс градоначалникот на Ново Село, Боро Стојчев кој беше повторно уапсен, овој пат за шверц на марихуана. Уапсениот судија доспеа во јавноста во јули минатата година кога на седницата на Судскиот совет се бираше неговиот син за судија, кривичар во Скопје 1, Георгиев поднесе оставка од член на Судскиот совет. Синот Кирил Георгиев беше еден од 25-мина нови судии кои на седница беа избрани по отворените огласи за основни судови во неколку градови во земјава.

Синот на поранешниот градоначалник на Ново Село, Боро Стојчев, во јавноста познат како „Боро Марлборо“ му ги носел парите на вчера приведениот судија во Врховниот Суд, Наке Георгиев, дознава неофицијално Инфомакс.

Инаку, Боро Стојчев претходно беше осуден на 18 месеци затворска казна поради шверц на цигари, но од затвор излезе по половина година поради намалување на казната, за кратко потоа да биде поврзан со дилери на дрога.

“Се поставува прашањето, дали на Боро Марлборо му беше намалена казната за шверц на цигари за да излезе на слобода и да може да тргува со дрога? Дали Боро Марлборо работел под директива или заштита на некој од власта“ – прашуваа од ВМРО-ДПМНЕ на партиски прес-конференции во март минатата година.

Според информациите на Инфомакс, Боро Стојчев и претходно се обидел да стапи во контакт со врховниот судија Георгиев со цел да добие негова помош за случај, по што неофицијално бил одбиен од Георгиев.

„Денеска (20.05.2024 г.) лишен од слобода е судија од Врховниот суд поради постоење на основи на сомнение за сторено кривично дело примање награда за противзаконито влијание. Судијата е лишен од слобода на лице место при извршување на кривичното дело. Се чекаат понатамашни насоки од надлежен јавен обвинител“, се вели во информацијата од МВР од каде посочија дека судијата е  лишен од слобода на лице место при извршување на кривичното дело и дека се чекаат натамошни насоки од надлежен јавен обвинител.

Како што претходно беше објавено, Наке Герогиев бил фатен со сума од 10.000 евра, по претходна пријава од лице кое тврдело дека му барал мито.

Наке Георгиев, инаку, не се повикал на својот судски имунитет, со кој му се гарантира правото на слободно движење и нелишување од слобода од страна на МВР.

Детали за апсењето на Врховниот судија Наке Георгиев