Касами: Груби и Рустеми веројатно ќе треба да сносат одговорност за делата со Коридорот 8

Првиот човек на Движењето Беса и градоначалник на Тетово, Биљал Касами денеска изјавил дека разговорите со конзорциумот „Бехтел и Енка“ одат во вистинска насока и дека очекува да продолжи изградбата на Коридорот 8. Тој истакнал дека актуелниот министер за транспорт, Александар Николовски и новиот директор на ЈПДП, Коце Трајановски треба да дадат дополнителни информации околу проектот.

Во емисијата „Дејли клик“, Касами нагласил дека поранешниот вицепремиер Артан Груби и поранешниот директор на ЈПДП, Ејуп Рустеми веројатно ќе треба да сносат одговорност за дејствијата поврзани со овој проект.

„И во однос на Коридорот 8 гарантираме дека сите разговори со Бехтел и Енка одат кон решавање на сите проблеми, дека динамиката на реализација на работите на терен е според договореното, бидејќи она што претходно го кажавме, го имаме ја алармираше јавноста, тоа сега го гледаме и секако и директорот и министерот наскоро ќе излезат со уште подетален извештај дека ДУИ на чело со Артан Груби и директорот Ејуп Рустеми направиле работи за кои најверојатно ќе треба да одговараат“, изјавил Касами.

Николоски претходно изјави дека проектот ќе продолжи.

„За жал, како е поставен договорот, мора двете страни да дадат согласност за оваа работа и се надевам дека ќе дадат согласност да го декласифицираме и јавноста да го види“, рече Николоски и додаде дека според него поважно е, земјата да добие повеќе киломери автопат од тој договор.

„Тоа ќе биде нашата главна битка во годините што следуваат е да добиеме повеќе километри автопат во рамки на истата финансиска сума која што е договорена, а исто така јавноста треба да знае дека претходната влада на СДСМ и ДУИ веќе има исплатено 240 милиони евра на изведувачот за буквално ништо, односно за т.н. подготвителни работи што не ги гледаме и мислам дека ќе биде недомаќински однос кон македонскиот буџет, ако сакате и душмански, јас сега да го прекинам договорот, а тие средства се веќе кај изведувачот и не може да се вратат. Изведувачот може да тужи и да побара арбитража и веројатно да платиме уште толку и да отидат половина милијарда евра на македонските граѓани, а да немаме ни километар автопат. Тоа што мислам дека е правилен пристап е да се бориме со нив, да добиеме што повеќе километри автопат, што побрзо изградиме во Македонија“, изјави Николоски.

Share on Facebook

Tweet

Follow us

Save