Нагло порасна вредноста на биткоинот

Вредноста на биткоинот порасна во понеделник наутро во Азија по обидот за атентат врз поранешниот американски претседател и претседателски кандидат Доналд Трамп, додека инвеститорите шпекулираа за неговите шанси да победи на ноемвриските избори. Се смета дека неговите шанси дополнително се зголемиле по атентатот.

Цената на биткоинот порасна за 9,1 отсто на 62.830 долари, откако напаѓач со огнено оружје лесно го рани Трамп во увото на митингот во Пенсилванија во саботата. Трамп, кој се сметаше за про-крипто-кандидат, беше домаќин на директори на индустријата во неговата резиденција Мара Лаго во Флорида, а неговата кампања прифаќа плаќања со криптовалути, пишува Фајненшл тајмс.

Ова е прв пат една голема политичка партија во САД да прифати плаќања со криптовалути. Во меѓувреме, индексот Ханг Сенг од Хонг Конг беше најголемиот губитник на главните пазари на акции. Меѓу валутите најмногу ослабе јужнокорејската вона во однос на доларот, откако падна за 0,7 отсто. Индија го надмина остатокот од Азија бидејќи реперниот индекс Нифти 50 благо порасна, додека рупијата остана рамна во однос на доларот.

Според минатонеделната прогноза на мултинационалната банка со седиште во Лондон Standard Chartered, цената на биткоинот би можела да достигне нов рекорд во август и потенцијално да се зголеми до 100.000 долари за време на претседателските избори во САД во ноември.

Биткоинот достигна рекордно високо ниво од 73.700 долари во март оваа година, а оттогаш се тргува помеѓу 59.000 и 72.000 долари. Аналитичарите на Standard Chartered го сметаат Трамп за „биткоин позитивен“ и укажуваат на позитивна корелација помеѓу неговите изборни шанси и цената на биткоинот.

Аналитичарите на Standard Chartered го разгледаа и „најмалку веројатното“ сценарио во кое сегашниот американски претседател Џо Бајден се повлекува од претседателската трка на крајот на јули, сугерирајќи дека тоа би можело да предизвика намалување на цените на биткоинот на 50.000 до 55.000 долари.

Share on Facebook

Tweet

Follow us

Save