Макрон: Мора да се направи се, за да се избегне ескалација на тензиите на Блискиот Исток

Францускиот претседател Емануел Макрон денеска му порача на својот ирански колега Масуд Пезешкијан да направи се што е во негова моќ за да избегне ескалација на тензиите на Блискиот Исток.

„Тој додаде дека циклусот на насилство мора да престане“, се вели во соопштението на Елисејската палата. Двајцата лидери разговарале телефонски.

Макрон рече дека Иран треба да ги повика „дестабилизирачките земји што ги поддржува“ да покажат воздржаност за да избегнат конфликт.

Тензиите во регионот се зголемија по атентатот на лидерот на Хамас Исмаил Ханије во Техеран минатата недела и по израелскиот напад врз Бејрут во кој загина командантот на Хезболах, Фуад Шукр.

Техеран го задржува правото да одговори на агресијата и заканите по безбедноста на Иран, изјави денеска иранскиот претседател Масуд Пезешкијан во телефонски разговор со францускиот колега Емануел Макрон.

„Исламската Република Иран смета дека избегнувањето војна и обидот за воспоставување мир и безбедност во светот е еден од нејзините основни принципи, но во рамките на меѓународното право никогаш нема да молчи пред заканите за интересите и безбедноста на земјата“, предупреди Пезешкијан.

Тој, исто така, го критикуваше „пасивното однесување“ на САД и другите западни земји по нападот на Израел врз иранската амбасада во Дамаск и атентатот на лидерот на Хамас, Исмаил Ханије во Техеран.

Пезешкијан посочи дека „регионот и светот нема да видат стабилност, безбедност и мир се додека ционистичкиот режим, со политичка, финансиска, вооружена и медиумска поддршка на САД и западните земји, врши геноцид, криминал и терор“.

Тој наведува и дека Иран отсекогаш играл улога во воспоставувањето мир и безбедност во регионот, но дека Израел се обидува да „предизвика пожар“ на Блискиот Исток со своите „криминални и терористички акции“ против Палестинците.

Иранскиот претседател го повика Западот да докаже дека е посветен на мирот во регионот со повлекување на поддршката за Израел и запирање на нападите врз Газа.

Share on Facebook

Tweet

Follow us

Save