INFOMAX.MK

Автомобилот со посмртните останки на Фатон Хајризи, кој беше ликвидиран кај Лозница откако претходно уби еден српски полицаец и рани друг, преку Мердар влегол во Косово ноќта меѓу четвртокот и петокот.
Адвокатот на семејството на Хајризи, Аријанит Кочи, рече дека го исполнил ветувањето да го донесе телото на Косово.

„Ветив дека ќе го донесам телото. Мисијата е добро остварена. Јас сум многу уморен. Телото е предадено на Институтот за судска медицина, на обвинителот и на косовската полиција. Сега продолжуваат со понатамошни процедури. Ќе има дополнителни истраги, тоа е одговорност на обвинителот. Сите документи што ги имав ги доставив до нашето обвинителство, во полиција, така што имавме одлична координација. Многу ни помогнаа Канцеларијата на Косово, министерот за надворешни работи и МНР“, рече Кочи.

Хајризи, кој побегна од косовски затвор на почетокот на јули, уби еден српски полицаец, а рани уште еден на 18 јули, недалеку од Лозница, откако патрола го запре на рутинска контрола.

Ден подоцна српската полиција го лоцирала, а потоа во пресметка го ликвидирала, со оглед на тоа што давал отпор при апсењето.