Си Џинпинг: Кина и САД треба да бидат извор на сигурност за светски мир

Кина и Соединетите Американски Држави треба да бидат извор на сигурност за светски мир и придвижувачи на заедничкиот развој, кажа кинескиот претседател Си Џинпинг на состанокот со американскиот советник за национална безбедност Џејк Саливен, пренесуваат агенциите.

„Кинеската посветеност на стабилен, здрав и одржлив развој на кинеско-американските односи останува непроменета“, кажа Си.

Кинескиот претседател го прими денес во Пекинг советникот за национална безбедност на Белата куќа кој од вторникот е во посета на Кина. Тоа е првиот американски советник за национална безбедност кој ја посетил Кина од 2016 година.

Тие осум години се период во кој односите меѓу Вашингтон и Пекинг се напнати поради трговски и безбедносни проблеми. Како што јавува Франс прес, Си му кажал на Саливен дека кинескиот ангажман за „здрави односи“ со Вашингтон „останува непроменет“.

Саливен претходно се сретнал и со кинескиот генерал и потпретседател на Централниот воен одбор Жанг Јусија, како и со шефот на кинеската дипломатија Ванг Ји.

Како што пишува германската агенција ДПА, средбата со генералот Жанг може да биде знак за приближување на Кина и САД. Жанг кажа дека состанокот ја покажува високата почит на Саливен за односите меѓу американската и кинеската војска.

Како советник на американскиот претседател Џо Бајден, Саливен игра клучна улога во формулирањето на американските безбедносни стратегии и координацијата на политиката кон Кина, додаде Жанг.

Централниот воен одбор е највисокото кинеско воено тело за носење одлуки, а со него претседава кинескиот претседател. „Двете страни повторно ја потврдија важноста на редовната комуникација меѓу војската и напорите за одржување дипломатија на високо ниво и отворени линии за комуникација според упатствата на претседателите Бајден и претседателот Си на самитот во Видсајд во ноември 2023 година“, соопшти Белата куќа.

Share on Facebook

Tweet

Follow us

Save