Синот на починатиот републикански сенатор Џон Мекејн ја напушти Републиканската партија и ќе ја поддржи Камала Харис

Џими Мекејн, син на починатиот републикански сенатор Џон Мекејн, планира да ја поддржи предизборната кампања на кандидатката за претседател на САД од Демократската партија, Камала Харис, јави ДПА.

Мекејн вчера изјави за Си-ен-ен дека се оградил од Републиканската партија и официјално се регистрирал како демократ. Тој го нападна републиканскиот претседателски кандидат Доналд Трамп, особено осудувајќи го неодамнешното појавување на Трамп на националните гробишта во Арлингтон.

Трамп положи венец на гробиштата во спомен на американските војници кои загинаа во самоубиствен напад во Авганистан пред три години.

По посетата, имаше извештаи за конфронтација меѓу тимот на Трамп и службеник на гробиштата, кој наводно бил турнат настрана кога се обидел да ги спроведе правилата на гробиштата, според американската војска.

Трамп беше обвинет дека ја искористил посетата за политички цели.

Џон Мекејн беше жесток критичар на Трамп, а неговата сопруга го поддржа Џо Бајден за претседателската номинација за време на Демократската национална конвенција. Сепак, ниту еден од блиските членови на семејството на покојниот републиканец досега не ја напуштил Републиканската партија.

Share on Facebook

Tweet

Follow us

Save