ССМ бара итен раст на платите: Минималната синдикална кошничка повторно ќе се зголеми

Сојузот на синдикатите на Македонија (ССМ) очекува благо зголемување на минималната синдикална кошничка, која ќе биде објавена следната недела, соопшти претседателот на ССМ, Слободан Трендафилов. Според него, ова ќе биде јасен сигнал до креаторите на политики и работодавачите во приватниот сектор дека растот на платите е итен.

„Раст на платите е потребен вчера, бидејќи денес е веќе доцна“, истакна Трендафилов, додавајќи дека високите цени укажуваат на тоа дека некој се збогатува на грбот на работниците.

Трендафилов исто така ја коментираше владината иницијатива за ограничување на профитната маржа на стотина основни прехранбени производи, вклучувајќи леб, млечни производи, месо и овошје. Тој ја оцени како позитивен чекор, но посочи дека „мерката треба да биде спроведена во целост“ за да има вистинско влијание врз намалувањето на цените.

Изразувајќи жалење што ССМ не бил вклучен во подготовката на владините мерки, Трендафилов истакна дека синдикалната кошничка, која за август изнесуваше 22.300 денари, треба да биде појдовна точка за планирање на мерките за ограничување на цените.

„Денес плаќаме зеленчук како да сме во јануари, а овошје како да сме сред зима, нешто што е неоправдано“, нагласи Трендафилов, додавајќи дека растот на цените мора да се контролира за да се заштитат граѓаните.

На следната владина седница се очекува усвојување на предлогот за ограничување на бруто профитната маржа до 10 проценти, кој ќе опфати основни производи како леб, млечни и месни производи, овошје и зеленчук.

Share on Facebook

Tweet

Follow us

Save