INFOMAX.MK

Денес министерот за правда Игор Филков остварил работна средба со министерката за правда на Република Косово, Албулена Хаџиу, во Приштина, соопшти неговиот кабинет.

На средбата се разговарало на повеќе теми кои се од интерес на двете држави. Било дискутирано и за две отворени прашања од интерес на двете земји – од кои едното е случајот „Монструм“, за кој од косовска страна било презентирано дека барањата за екстрадиција се процесуирани од страната на Јавното обвинителство и дека веднаш откако ќе биде донесено решение или ќе имаат конкретни информации, ќе ги проследат до Министерството за правда на Република Македонија.

„Во однос на нивните барања за случајот „Диво насеље“, министерот Филков посочи дека сите предмети се земени во работа и дека се постапува со нив согласно националното законодавство и сите меѓународни стандарди“, се вели во соопштението.

Косово досега одбиваше да ги испорача во Македонија Алил Демири и Африм Исмаиловиќ, кои и двајцата се осудени на доживотен затвор за петкратното убиство кај Смилковското Езеро во 2012 година.