Тројца лидери го прескокнаа самитот на БРИКС во Казан, меѓу нив и Вучиќ и покрај поканата на Путин

Претседателите на Бразил, Луис Инасио Лула да Силва, Куба, Мигел Дијаз-Канел и на Србија, Александар Вучиќ, нема да присуствуваат на Самитот на БРИКС во Казан, Русија, изјави помошникот на рускиот претседател Јуриј Ушаков.

Самитот, кој ќе трае од вторник 22 до четврток 24 октомври, ги собира лидерите на клучните економии во развој, но неколку лидери се повлекоа поради „непредвидени околности“, пишува Киев пост.

Самитот е најголемиот таков состанок во Русија од агресијата врз Украина и доаѓа во време кога рускиот претседател Владимир Путин се обидува да покаже дека обидите на Западот да ја изолира Москва за време на офанзивата која траеше две и пол години, не успеаја.

Ушаков потврди дека Бразилецот Лула да Силва не може да присуствува поради здравствени проблеми, додека Кубанецот Дијаз-Канел одлучи да остане дома за да се справи со сериозните енергетски прашања.

Двете земји ќе бидат претставени од делегации на високо ниво предводени од национални министри.

Своето отсуство го најави и српскиот претседател Александар Вучиќ, кој го наведе напорниот распоред – посетите на грчките, полските и лидерите на ЕУ на Белград.

Вучиќ кажа дека на негово место Србија ќе испрати четворица високи државни функционери.

И покрај овие отсуства, на самитот се очекува да се соберат околу дваесетина лидери, вклучително и кинескиот претседател Си Џинпинг, индискиот премиер Нарендра Моди и турскиот претседател Реџеп Таип Ердоган.

Share on Facebook

Tweet

Follow us

Save