Инфлацијата во Швајцарија падна на 0,6 отсто, најниска од јуни 2021 година

Годишната стапка на инфлација во Швајцарија во октомври падна од 0,8 отсто во септември на 0,6 отсто и сега е најниска од јуни 2021 година, објави Швајцарското Федерално биро за статистика (БФС).

Според извештаите, цените на транспортот во Швајцарија во октомври паднале за 2,7 отсто на годишно ниво, облеката и обувките за еден отсто, а во здравството за 0,8 отсто.

Инфлацијата во категоријата домување и енергија го забави растот на 3,5 отсто, додека цените на храната и безалкохолните пијалоци паднаа за 0,3 отсто.

На месечна основа, инфлацијата во Швајцарија исто така падна за 0,1 отсто во однос на септември. Годишната стапка на базичната инфлација во Швајцарија исто така падна од еден процент на 0,8 проценти.

Швајцарија започна циклус на намалување на каматните стапки, а централната банка на земјата претходно сигнализираше дека ќе ги намали каматните стапки четврти пат по ред во декември.

Ниското ниво на инфлација во земјата создава дополнителни услови за поагресивно намалување на референтната каматна стапка, која во моментов изнесува еден процент, пренесува Блумберг.

Економистот на Goldman Sachs, Катја Вашинскаја, смета дека врз основа на тековните резултати, Швајцарската национална банка (SNB) ќе ја намали каматната стапка за 50 базични поени во декември и за уште 25 базични поени во март 2025 година.

Share on Facebook

Tweet

Follow us

Save