Украински воен функционер: Изгубивме 40 отсто од територијата во регионот Курск

Украина изгуби 40 отсто од територијата во регионот Курск во Русија, кој брзо го освои во август, изјави денеска за Ројтерс високо позициониран извор во украинската војска.

Според неименуван извор од украинскиот Генералштаб, Русија распоредила околу 59.000 војници во регионот Курск откако украинските сили влегле на руската територија и направиле брз напредок во август, со што ја фатиле Москва неподготвена за одбрана.

„Во најдобар случај, контролиравме околу 1.376 квадратни километри, сега, се разбира, тоа е помала територија. Непријателот ги засили контранападите“, изјави украински воен извор.

Според него, Украина во моментов контролира околу 800 квадратни километри во регионот Курск.

„Ќе ја држиме таа територија сѐ додека тоа е воено можно“, додаде тој.

Офанзивата во Курскиот регион беше прва копнена инвазија на руска територија од страна на странска сила по Втората светска војна, објави Ројтерс.

Со навлегувањето во Курск, Киев се обиде да ги задржи руските офанзиви во источна и североисточна Украина, да ја принуди Русија да ги повлече трупите кои постепено напредуваа на исток и да обезбеди дополнителна моќ за преговарање во какви било идни мировни преговори.

Share on Facebook

Tweet

Follow us

Save