Левица: „Јовица Илиевски од ДПМНЕ ја брани иредентистичката приредба во Челопек“

Политичката партија Левица изрази силна осуда за изјавите на градоначалникот на општина Брвеница, Јовица Илиевски од ВМРО-ДПМНЕ, кој според нив, наместо да преземе одговорност, го брани скандалозниот настан.

Во реакцијата, Левица потенцира дека приредбата, одржана по повод Денот на албанското знаме, вклучувала промоција на насилство и нетрпеливост, што е спротивно на принципите на воспитно-образовниот процес во македонските училишта.

Се поставува прашањето: Дали градоначалникот е запознаен со Наставниот план и програма и со Законот за основно образование? Каде е предвидено славење на симболи и содржини кои го нарушуваат уставниот поредок и унитарноста? Наместо воспитување на култура, знаење и почит кон државните симболи, ваквите настани предизвикуваат поделби и нетрпеливост меѓу децата.

Приредбата со оружја за Денот на албанското знаме не е во согласност со македонскиот образовен систем и претставува грубо кршење на принципите на воспитно-образовниот процес. Одговорноста на градоначалникот и раководството на училиштето е очигледна, но наместо санкции, Илиевски одлучува да го игнорира револтот на јавноста и целосно да премолчи за повредата на законите.

Ги повикуваме сите надлежни институции, вклучувајќи го и Министерството за образование и наука, да преземат итни мерки за расчистување на случајот и санкционирање со цел ваквата пракса да не продолжи во иднина. Ова не е прашање на политика или лични интереси, туку на заштита на образовниот систем и зачувување на националните интереси. Секој што ќе го занемари ова прашање, директно придонесува за зголемување на поделбите и нарушувањето на меѓуетничките односи.

Националното достоинство мора да биде заштитено, а најмладите мора да растат во средина која ги промовира мирот, почитта и единството, наспроти насилството, поделбите и конфликтите, се наведува во реакцијата на Левица.

Share on Facebook

Tweet

Follow us

Save