Извозот и инвестициите стагнираат, главен двигател на растот на БДП е трговијата

Економијата во Македонија продолжува со умерено закрепнување, забележувајќи раст на бруто-домашниот производ (БДП) од 3% во третиот квартал од 2024 година, објави институтот „Фајнанс тинк“. Ова претставува забрзување споредено со претходните квартали, поддржано од раст на потрошувачката и стабилизација на буџетот.

Најголем придонес во растот има јавната потрошувачка, која порасна за значителни 13.3%, што е директен резултат на повисоката буџетска активност во текот на годината, како и приватната потрошувачка, која иако умерена, се зголеми за 1.9%.

Во истиот период, извозот, увозот и инвестициите стагнираат, продолжувајќи го трендот од претходните квартали.

Од секторска гледна точка, трговијата е главниот двигател на растот со пораст од 10.6%. Наспроти тоа, индустријата забележа пад од 4.6%, што влијаеше на вкупниот економски биланс.

Невработеноста продолжува да опаѓа, достигнувајќи 12.3%. Во третиот квартал се создадени околу 7.000 нови работни места, главно во земјоделството и индустријата. Во трговијата, и покрај растот на додадената вредност, бројот на вработени се намалува.

Годишната инфлација во третиот квартал изнесува 2.6%, што е значително намалување споредено со претходните периоди. Институтот ја посочува стабилизацијата на трошоците за плати како еден од клучните фактори за овој тренд.

„Фајнанс тинк“ предвидува раст на БДП за целата 2024 година од 2.7%, со инфлација од 3.8%. За 2025 година, очекувањата се уште попозитивни, со раст од 3.5% и инфлација од 2.4%.

Повеќе детали може да се најдат во целосниот извештај на „Фајнанс тинк“.

Share on Facebook

Tweet

Follow us

Save