Швајцарија ја забрани „Хезболах“

Швајцарскиот парламент гласаше за забрана на либанската група „Хезболах“, нарекувајќи ја закана за меѓународната безбедност. Аналитичарите посочуваат дека ова е невообичаен чекор за оваа неутрална земја, која традиционално ја следи политиката на промовирање меѓународен дијалог и посредување, објавија светските медиуми.

Забраната беше усвоена со 126 гласа „за“, 20 „против“ и 41 воздржан во Долниот дом на парламентот, откако минатата година доби одобрение од Горниот дом.

Швајцарската Влада се спротивстави на оваа мерка, со образложение дека може да влијае врз нејзината улога како неутрален посредник.

– Ако Швајцарија сега продолжи да ги забранува таквите организации со посебни закони, треба да се запрашаме каде и како се повлекуваат границите, рече министерката за правда Беате Јанс за време на парламентарната дебата.

Комитетот за безбедносна политика, кој ја предложи забраната, истакна дека посредничката улога на Швајцарија ќе остане недопрена благодарение на посебната одредба за мировни разговори и хуманитарна помош.

Минатата недела, швајцарскиот парламент ја прогласи за незаконска палестинската група Хамас поради нејзините напади во Израел на 7 октомври 2023 година.

Швајцарија претходно имаше забрани само за Ал Каеда и Исламската држава, кои се на листата на ОН на терористички организации.

Share on Facebook

Tweet

Follow us

Save