Стармер пристигна во Украина на разговори со Зеленски

Британскиот премиер Кир Стармер денеска пристигна во Украина со ветување дека ќе помогне во обезбедувањето на безбедноста на земјата, неколку дена пред Доналд Трамп да ја преземе функцијата.

Британската влада објави дека Стармер и украинскиот претседател Володимир Зеленски ќе потпишат договор за „стогодишно партнерство“ во Киев, кој ќе вклучува области како што се одбраната, науката, енергијата и трговијата.

Ненајавеното патување на британскиот премиер во Украина е негова прва посета на земјата по доаѓањето на власт во јули минатата година.

Велика Британија, еден од најголемите поддржувачи на Киев, обезбеди воена и цивилна помош во вредност од 12,8 милијарди фунти откако руските сили ја нападнаа Украина пред речиси три години.

Обединетото Кралство учествуваше и во обука на над 50,000 украински војници на британска територија.

Се очекува Стармер да објави и доделување на 40 милиони британски фунти помош за повоената обнова на земјата.

Share on Facebook

Tweet

Follow us

Save