И Вучиќ му честиташе на Трамп: Секогаш сте имале најголема поддршка во Србија

Претседателот на Србија, Александар Вучиќ, денеска упати честитка до Доналд Трамп, по повод преземањето на, како што рече, одговорната и тешка должност на претседателот на САД и му посака успех во новиот мандат.

„Се радувам на соработка и верувам во вашата визија за свет во кој ќе владеат мирот, слободата, правото и правдата за сите. Во овие напори Србија ќе биде ваш сигурен партнер и пријател. Секогаш сте имале најголема поддршка во цела Европа од граѓаните на Србија и затоа Србија очекува и се надева на исклучителна и блиска соработка“, напиша Вучиќ од Давос, каде што присуствува на Светскиот економски форум, во објава на мрежата Х.
Тој му посака успех на Трамп во новиот мандат и рече дека е убеден оти новиот американски претседател „храбро ќе се соочи со сите предизвици, како и секогаш досега“ и дека ќе продолжи, како што наведе, силно да се бори „за просперитет на Соединетите Американски Држави и глобалниот мир, градејќи мостови кон сите кои го споделуваат со вас највисокото морално, традиционално и државните вредности“.
Новоизбраниот претседател Доналд Трамп вчера положи заклетва како 47-ми претседател на Соединетите Американски Држави.

Share on Facebook

Tweet

Follow us

Save