INFOMAX.MK

Папата Франциск денеска во писмо до американските бискупи повика на поддршка за мигрантите, кои се соочуваат со масовни депортации, остро критикувајќи ги новововедените политики на американскиот претседател Доналд Трамп и потсетувајќи дека „и Исус, Марија и Јосиф биле мигранти“.

Масовните депортации се „рана на човечкото достоинство“, оцени папата и се осврна на зборовите на Пиј 12-ти, папата кој пишувал за емиграцијата на Исус Христос во Египет, јавија светските медиуми.

– Семејството од Назарет во егзил, Исус, Марија и Јосиф, кои емигрираа во Египет и таму најдоа засолниште за да го избегнат гневот на злобниот крал, се пример и утеха за емигрантите и аџиите од сите возрасти и од секоја земја, за сите бегалци во каква било состојба, кои поради напади или поради кои нивните пријатели мораа да ја напуштат својата земја и да заминат во туѓина“, Франциск ги цитираше зборовите на папата Пиј.

Папата Франциск потсети дека луѓето често емигрираат поради сиромаштија, експлоатација и прогонство и дека масовните депортации се против човечкото достоинство и емпатија.

– Она што се гради на сила, а не на вистината за еднаквото достоинство на секој човек, почнува лошо и лошо ќе заврши – предупреди папата.

Ден по неговата инаугурација на 20 јануари, Трамп започна политика на масовни депортации на мигранти кои немаат законски регулиран статус во САД, главно со потекло од Латинска Америка.