Рубио во Ерусалим: Хамас мора да биде уништен

Американскиот државен секретар, Марко Рубио, на прес-конференција одржана со израелскиот премиер, Бенјамин Нетанјаху, рече дека палестинската исламистичка група Хамас не смее да остане владејачка сила во Појасот Газа.

„Се додека Хамас е сила на која и е дозволено да владее тука или сила која може да се заканува со насилство, мирот е невозможен“, рече Рубио, нагласувајќи дека Хамас мора да биде уништен.

Говорејќи по нивниот состанок во Ерусалим, Нетанјаху и Рубио повторија дека не смее да му се дозволи на Иран да развива или поседува нуклеарно оружје и го обвинија Техеран дека ја поттикнува нестабилноста.

„Зад секоја терористичка група, зад секој чин на насилство, зад секоја дестабилизирачка активност, зад сè што ги загрозува мирот и стабилноста на милиони луѓе кои овој регион го нарекуваат дом, стои Иран“, рече Рубио.

„Израел и Америка стојат рамо до рамо во соочувањето со иранските закани“, рече Нетанјаху.

Нетанјаху рече дека Израел му зададе „силен удар“ на Иран од почетокот на војната во Газа и рече дека со поддршката на американскиот претседател Доналд Трамп „не се сомнева дека можат и ќе ја завршат работата“.

И двајцата повикаа на разоружување на либанската милиција Хезболах, додека Нетанјаху истакна дека Израел е многу посветен на спроведувањето на постојниот прекин на огнот во Либан.

Рубио го пофали американскиот претседател Доналд Трамп за неговата храброст да предложи план за иднината на Појасот Газа што ги надминува „истрошените идеи“ од минатото.

Трамп неодамна го навлече гневот на арапските нации и групите за човекови права кога предложи трајно преместување на околу два милиони жители на Газа во арапските држави и трансформирање на уништената крајбрежна област во „Ривиера на Блискиот Исток“.

Нетанјаху рече дека целосно соработува со Трамп на „заедничка стратегија“ и додаде дека Трамп е „најголемиот пријател што Израел некогаш го имал во Белата куќа“.

Пред неговото патување, Рубио ги повика арапските држави да ги претстават своите предлози за иднината на Појасот Газа.

Share on Facebook

Tweet

Follow us

Save