Протести низ Србија за поддршка на деканката од Ниш што беше нападната со нож

Вечерва во Ниш собир за поддршка на нападната деканка Наталија Јовановиќ откако со нож беше повредена непосредно пред почетокот на протестот „Под рефлектор на науката“.

Студентите потсетуваат дека ова е втор напад врз деканката Наталија Јовановиќ, но и уште еден во низата напади врз оние кои сакаат на фер начин да дојдат до вистината, пишуваат српските медиуми.

И граѓаните во Ваљево вечерва излегоа на протестна прошетка под слоганот „Излези и поддржи нови барања“, а маршот ќе се одржи до населбата Колубара 2 каде ќе биде изразен 16-минутен молк.

Протестен марш почна и во Борча.

Дел од вработените во Астрономската опсерваторија во Белград ги поддржаа студентите во нивната борба за одговорна и правна држава, во која институциите работат транспарентно и за доброто на целото општество.

„Длабоко веруваме дека слободата на мислата, говорот и правото да се бориме за подобрување на државата и нејзините институции се основата на секое слободно и праведно општество. Најостро го осудуваме секој облик на притисок, закани и напади врз студентите, како и обидите да се замолчи нивниот глас, да се девалвира, да се потчини на партиска борба или да се претстават како нечии марионети.

Денеска и Филозофскиот факултет во Белград го осуди нападот врз професорката Наталија Јовановиќ, декан на Филозофскиот факултет во Ниш.

„Навредите и заканите упатени кон Универзитетот и неговите претставници кулминираа со напад со нож врз универзитетски професор и декан на една од најпрестижните образовни институции во земјата. Ова не може да се смета како изолиран инцидент.

Се додава дека на Универзитетите и нивните членови мора да им се остави простор на слободно и критичко размислување, дијалог и одговорност, а физичкото насилство врз оние кои се залагаат за знаење, социјална правда и достоинство на образованието е директен напад на овие вредности, неспоиви со кое било цивилизирано општество.

Share on Facebook

Tweet

Follow us

Save